BOA (Başbakanlık Osmanlı Arşivi) EV MH 01061 0184'de kayıtlı Niksar'da Mevlevihane ile ilgili 1281 tarihli vesikanın yeni harflere çevirisidir.
Nezaret-i Celile-i Evkaf-ı Hümayuna
28 Zilhicce 280 ve 2 Mayıs 280 tarihiyle muverrah … tevkir ve ihtiram olan emirname-i aliye-i nezaretpenahilerinde reşadetlu Çelebi Efendi hazretleri taraflarından meşihati ba icazetname şeyh el-Hac Mehmed Gülşeni Efendi uhdesine ihsan buyrulan Niksar Mevlevihanesinin varidat ve keyfiyat-ı sairesinin bittahkik arz ve beyanı irade ve iş'ar buyrulmuş olduğundan mucibince Sivas valisi devletlu paşa hazretleri taraflarından ve taraf-ı acizanemden memur-i mahsusa marifetiyle mahalli meclisine meb'us tahriratla cevaben tevarud eden mazbatanın hulasa-i mealinde murur-i ezmine ile Mevlevihane-i mezkure müşrif-i harab olub eser-i binası mahiv olmuş ve ahaliden bazı kasan taraflarından kasaba-i mezkurede vaki nehri carinin ittisalinde Mevlevihane çeşmesi mevcud olduğu ve üst tarafındaki arsa-i haliye Mevlevihane yeri bulunduğu ve keyfiyat-ı sairesi haber verilmiş ve mahkemede müseccel olan kuyudatın mumza suretiyle mahallinden mevrud mazbata ve meclis-i kebirden tanzim olunan mazbata matviyyen tahkim-i pişgah-ı ali cenab-ı nezaretpenahileri kılınmış ve icrayı iktizası irade-i seniyyelerine mütevakkıf bulunmuş olmağla ol babda emru ferman hazret-i men lehul-emrindir. 13 R. evvel 81 ve 14 Ağustos 80
Müdir-i Evkaf
Sivas
Reşadetlu Çelebi Efendi hazretleri taraflarından ba icazetname kendüsüne ihale olunan Niksar Mevlevihanesi meşihatı henüz uhdesine tevcih bulunmamış olduğundan bahisle kaydı atiki mucibince mezkur meşihatin tevcihiyle lazım gelen berat-ı şerifin itası husus-i tarikat-i aliyye-i mevleviyeden el-Hac Seyyid Mehmed Gülşeni Efendi tarafından mukaddimen ba arzuhal ledel-istid'a kuyuda bil-muracaa Mevlevihane-i mezkurun zaviyedarlığı tayin ve bila tarih şeyh İbrahim Efendinin uhdesinde olub vakfının henüz muhasebesi ruyet olunduğunun kabul bulunmadığı ve ber mantuk-i defter-i hakani Mevlevihane-i mezkur nezdinde kain bağ ile mevaddı sairesinin fi sene tevcihatı mezkur Mevlevihane vakfı tarafından zabt olunmak iktiza eylediği anlaşılmış olduğundan badehu tesviye-i icabına bakılmak üzere evvel emirde mezkur Mevlevihane zaviyedarlığı kayden uhdesinde bulunan muma ileyh İbrahim Efendi kimdir ve tarih-i kayda nazaran vefat etmiş olacağı derkar ise de evlad ve ahfadından kimesnesi var mıdır el-yevm mevcud ve mamur olub muma ileyh gülşeni el-hıssa bilicare ihale olunduğu vaki midir şuralarının mahallinde şer'i şerif ve meclis ve evkaf müdürü marifetleriyle tahkik ve vakfı mezkurun icab eden tarihden yetmiş dokuz senesi gayetine değin muhasebesi ruyet ve tetkik olunarak defterinin seri'an irsali zımnında yevmi 27 safer 80 tarihiyle daire-i evkaf-ı humayundan yazılan tahriratın henüz cevabı vurud etmemiş olduğundan tekiden bu kere dahi ba arzuhal-i istid'a olunmuş ve suret-i hal evkaf müdürlüğüne dahi iş'ar kılınmış olmağla iş'ar-ı sabık vecihle husus-i müsted'anın serian ve acilen icrayı icabıyla keyfiyetin inhası hususuna dair 8 C. Evvel 80 tarihiyle Sivas valisiyle evkaf müdürüne tahrirat-ı aliye tasdir buyrulduğu halde masdur ve mukayyeddir. Ol babda emru ferman hazret-i men lehul-emrindir. 5 R. Ahir 81.
